बाँदर विरुद्ध प्रशासनमा उजुरी

खोटाड मंसिर १४ गते ।
खोटाङको दिक्तेल नगरपालिकासहित पाँच गाविसका किसानले बाँदर आतङ्क नियन्त्रणको माग गर्दै जिल्ला प्रशासन कार्यालयलाई गुहारेका छन्।खेतबारीमा लगाइएको धान, मकै, कोदो, गहुँ र आलु लगायतका बालीनाली बाँदरले सखाप बनाइदिने गरेको दिक्तेल, नेर्पा, दोर्पा्चिउरीडाँडा र लफ्याङका किसानले बाँदर आतङ्क नियन्त्रणकालागि जिल्ला प्रशासन कार्यालयलाई गुहारेका हुन्।

बाँदर आतङ्कले कृषि उत्पादनमा ह्रास ल्याएका कारण बसाई सर्नुपर्ने अवस्था आएकाले प्रशासनलाई गुहार्नु परेको स्थानीय शिबप्रसाद आचार्यले बताए। किसानले बाँदर आतङ्क नियन्त्रणकालागि दीर्घकालीन कार्ययोजना बनाउन वा उचित क्षतीपुर्तीको व्यवस्था मिलाउन माग गर्दै प्रशासनमा निवेदन दिएका छन्।

बाँदरले बालीनाली नष्ट गरेका कारण किनेको अन्न अन्नमा निर्भर रहनुपर्ने गुनासो किसानले गरेका छन्। घरभित्रै राखिएको अन्न खाइदिन थालेपछि बाँदर धपाउनतिर लाग्दा बालबच्चाको पठन–पाठनमा नकरात्मक असर पुगेको लगायतका समस्या आइपरेको निवेदनमा उल्लेख छ।