​इटहरीमा बृहत् औद्योगिक प्रदर्शनी हुने

इटहरी, मङ्सिर १० गते ।
प्रथम उद्योग दिवस–२०७३ को अवसर पारेर प्रदेश नम्बर १ को महत्वपूर्ण शहर इटहरीमा आगामी मङ्सिर २२ देखि २६ गतेसम्म पाँचदिने लघु उद्योगबाट उत्पादित प्रदेश १ स्तरीय बृहत् औद्योगिक प्रदर्शनी मेला आयोजना हुने भएको छ।

नेपाल घरेलु तथा साना उद्योग महासङ्घ सुनसरी, उद्योग वाणिज्य सङ्घ सुनसरी, इटहरी, जिल्ला लघु उद्यमी सङ्घ, सुनसरीको आयोजना तथा जिविस सुनसरी, घरेलु तथा साना उद्योग कार्यालय, इटहरी तथा इटहरी र धरान उपमहानगरपालिका लगायतको सहयोगमा उक्त बृहत् औद्योगिक प्रदर्शनी मेला हुने बिहीबार इटहरीमा आयोजित पत्रकारसम्मेलनमा जानकारी दिइयो ।

प्रदेश नम्वर १ को तराई तथा पहाडी जिल्लामा उत्पादन हुँदै आएका महत्वपूर्ण लघु घरेलु उत्पादनका सामग्रीको सघन सहभागिता गराइने औद्योगिक प्रदर्शनीअन्तर्गत सुनसरीको पटेर झल्ला, झापाको पेटानी, इलामको चिया, अलैँची, ताप्लेजुङको गलैँचा, खाँडी कपडा, धनकुटाको बाँस हस्तकला र फलफूल, भोजपुरको खुकुरी र करुवा, तेह्रथुमको ढाका, सङ्खुवासभाको अल्लो राडीपाखी लगायतका सामग्री प्रदर्शनीमा रहने बताइएको छ ।

घरेलु तथा साना उद्योगका प्रचुर दर्ता र हजारौँ मानिसले रोजगार प्राप्त गरिरहेको औद्योगिक सघनता रहेको सुनसरी जिल्लाका उद्यमीले पर्याप्तरुपमा बजार पाइरहेको अवस्था नरहेकाले त्यसको प्रवद्र्धन गर्न पनि यो प्रदर्शनी मेला निकै सहयोगी हुने विश्वास गरिएको छ ।

करिब १३ लाख रुपियाँ खर्च हुने प्रदर्शनी मेलामा कम्तीमा ७० वटा स्टल रहने र प्रदर्शनी अवधिमा २० हजार मानिसले प्रदर्शनीको अवलोकन गर्ने तथा त्यस अवधिमा कम्तिमा पनि एक करोडभन्दा बढीको आर्थिक कारोबार हुने अनुमान गरिएको पनि पत्रकारसम्मेलनमा नेपाल घरेलु तथा साना उद्योग महासङ्घ सुनसरी अध्यक्ष राजेन्द्रकेशरी घिमिरेले पत्रकारसम्मेलनमा जानकारी दिए ।

सो अवसरमा इटहरी उद्योग वाणिज्य सङ्घका अध्यक्ष लिलम बस्नेतले ‘औद्योगिक क्षेत्रमा लगानी समृद्धिको सुनौलो बिहानी’ भन्ने नाराका साथ गर्न लागिएको यो प्रदर्शनी प्रदेश १ का लागि ऐतिहासिक बन्ने दावी गए ।