नेपालले आज मकाउसंग प्रतिस्पर्धा गर्दैछ

काठमाडौ, ३० कात्तिक । एएफसी सोलिडारिटी कप
फुटबल प्रतियोगिताको उपाधिका लागि नेपालले आज मकाउसंग प्रतिस्पर्धा गर्दैछ । मलेसियाको कुचिङस्थित सारावक स्टेडियममा नेपाली समयअनुसार आज साँझ
 सवा ५ बजे खेल हुनेछ । प्रतियोगितामा नेपालले विजय लक्ष्यका साथ मकाउको सामना गर्ने तयारी गरेको छ ।

७ राष्ट्र सहभागी प्रतियोगितामा नेपाल र मकाउ अपराजित रहँदै फाइनलमा प्रवेश गरेका हुन् । शनिबार भएको सेमिफाइनलमा नेपालले लाओसलाई पेनाल्टी सुटआउटमा
३–० गोलअन्तरले पराजित गर्दै फाइनल यात्रा तय गरेको हो । मकाउले भने बु्रनाईलाई पेनाल्टी सुटआउटमा ४–३ गोलअन्तरले हराउँदै फाइनलमा नेपालसँगको भेट पक्का गरेको थियो ।

नेपाल र मकाउवीच यसअघि भएका ५ खेलहरुमा नेपालले ३ जीत हासिल गरेको थियो भने एक खेलमा मकाउ जीत र एक खेल बराबरी भएको थियो । फिफा वरियतामा नेपाल १८६ औँ तथा मकाउ १९६ औँ स्थानमा छ ।