जाडो बढेपछि तेह्रथुमका आगलागि पीडितहरु आफन्तको शरणमा

तेह्रथुम, ११ पौष ।
तेह्रथुमको सक्रान्ति बजारमा आगलागीपछि पीडितहरुको पुनःस्थापनाका लागि  निर्माण गरिएका टहरा रित्तै भएका
 छन् ।

आफन्त र छिमेकीका घरमा शरण माग्न पुगेका पीडितहरुलाई तत्काल अस्थायी आवासको रुपमा टहरा निर्माण गरी पुनर्वास गर्ने लक्ष्यले टहरा निर्माण गरिएको भएपनि चिसोका कारण पीडितहरु टहरामा बस्न नसकेका हुन् । साप्ताहिक हटिया लाग्ने टहरामा वरिपरि जस्तापाताले घेरेर टहरा निर्माण गरिएको छ ।

अहिलेसम्म जम्मा १४ वटा टहरा निर्माण गरिसकिएको छ । तर ती टहरा अधिकांश खाली छन् । टहराको बसाईलाई प्रशासनले सुविधा सम्पन्न बनाउन प्रयत्न गरेको भएपनि पीडितहरु कठ्याङ्ग्रिदो चिसोका कारण टहरामा बस्न नसकेको बताउँछन् ।

अग्नीपीडित दिपेश सिटौला दिउँसैपनि सिरेटो र हुस्सुले चिसो रहने यहाँ रात काट्न कसरी सक्नु भन्दै आफन्तकोमा शरण लिनु परेको बताउनुहुन्छ । अग्नीपीडितका लागि निर्माण गरिएका टहरामध्ये अहिले ५ परिवार मात्रै टहरामा बसिरहेका छन् । त्यसबाहेक केही परिवार पुरानो कृषि भवन र बाँकी पीडितहरु अझैपनि आफन्त र छिमेकीको शरणमा छन् ।

निजी क्षेत्रका विभिन्न संघसंस्थाहरुले लत्ता कपडा, सिरक डसना राहतमा दिएपनि सरकारी तवरबाट कुनैपनि सहयोग भएको छैन । विशेषगरि बालबालिका र बृद्धबृद्धा चिसोले कठ्याङ्ग्रिएका छन् ।

गत पुष १ गते दिउँसो भएको आगलागीबाट २९ घर जल्दा सक्रान्तिबजारका ७३ परिवारका १ सय ५० जना बढी प्रत्यक्ष प्रभावित भएका छन् । त्यसमध्ये ५१ जना बालबालिका रहेको पाइएको छ ।