कार्ययोजना र संगठन सुधारमा माओवादी नेताको जोड

काठमाडौँ,साउन ७ गते । रातो तारा डट कम,पार्टीको संगठन सुधार तथा व्यवस्थापनका लागि ठोस कार्ययोजनाका साथ काम गर्नुपर्ने र विगतका गल्तीबाट पाठ सिकेर जानुपर्नेमा नेकपा ९माओवादी केन्द्र०का नेताले जोड दिएका छन् ।

पार्टी केन्द्रीय कार्यालय पेरिसडाँडामा जारी केन्द्रीय कार्यालयको सचिवालयको बैठकमा धारणा राख्ने अधिकांश नेताले माओवादी पार्टी जनताको बलमा स्थापित भए पनि आचरण र सांगठनिक संरचना पूँजीवादी शैलीको भएको र केही नेता पनि सामन्तवादी शैलीको भएको बताउँदै कार्यशैलीसमेत सुधार गर्नुपर्ने टिप्पणी गरेका थिए । नेताहरुले स्थानीय तहको निर्वाचनबाट पार्टी स्थापित हुने चरणमा प्रवेश गरेकाले निराश हुनुपर्ने अवस्था नभएको उल्लेख गरे ।

स्थानीय तहको निर्वाचनमा माओवादीले ८४ स्थानमा विजय हासिल गरेको, ८५ स्थानमा दोस्रो भएको तथा ३० भन्दा बढी स्थानमा केही मतले मात्रै पराजित भएकाले आत्तिहाल्ने अवस्था छैन भन्दै नेताले शीर्ष नेतृत्वले आँट गर्ने हो भने आगामी निर्वाचनमा एकदमै राम्रो परिणाम हासिल हुने बताए।
बैठकमा नेता नारायणकाजी श्रेष्ठले पार्टीलाई सामूहिक नेतृत्व प्रणालीमा चलाउनुपर्ने तथा कार्यदिशा र नीतिमा समेत एकरुपता दिनुपर्ने बताउनुभयो । उहाँले नेतृत्वलाई सचेत बनाउनुपर्ने र गलत कार्यको विरोध गर्ने संस्कारसमेत स्थापित हुनुपर्नेमा जोड दिँदै कसैको अति प्रशंसा र कसैलाई खुल्याउने प्रवृत्ति गलत रहेको स्पष्ट गर्नुभयो ।

नेता टोपबहादुर रायमाझीले गुटबन्दीले पार्टीलाई समस्यामा पारेकाले त्यसको समूल अन्त्यका लागि आफू लागिपरेको बताउँदै आफू संसदीय दलको उपनेता भए पनि केही निर्णयमा आफूलाई समेत थाहा नहुने गरेको गुनासो गर्नुभयो ।

अर्का नेता टंक राईले माओवादीका कार्यकर्ता असाध्यै इमान्दार रहेको देखेर नै आफू एकता प्रक्रियामा आएकाले संगठन निर्माणमा विशेष जोड दिनुपर्ने बताउनुभयो । नेता गिरिराजमणि पोखरेलले विचार, संगठन र कार्यदिशालाई इमान्दारीपूवर्क लिएर जानेतर्फ सबै नेता तथा कार्यकर्ताले सचेत पहल गर्नुपर्ने धारणा राख्नुभयो ।

धारणा राख्ने क्रम जारी रहेकाले शनिबार पुनः बैठक बस्ने प्रवक्ता पम्फा भुसालले जानकारी दिनुभयो ।