नेपालका प्रम शेरबहादुर देउवाले भारत भ्रमणका क्रममा दिल्लीमा दिएको अभिव्यक्तिले देशकै शिर निहुराएकोछ:ओली

काठमाडौं, भाद्र ९ गते। रातो तारा डट कम,
प्रमुख प्रतिपक्षी दल नेकपा एमालेका अध्यक्ष केपीशर्मा ओलीले प्रधानमन्त्री शेरबहादुर देउवाले भारत भ्रमणका क्रममा दिएको अभिव्यक्तिले देशकै शिर निहुराएको बताएका छन्। नियमित स्वास्थ्य चेकजाँचका लागि थाइल्याण्ड प्रस्थान गर्ने क्रममा शुक्रबार त्रिभुवन विमानस्थलमा आयोजित पत्रकार सम्मेलनमा बोल्दै अध्यक्ष ओलीले संविधानको सर्वस्वीकार्यताबारे प्रधानमन्त्रीले भारतमा दिएको अभिव्यक्ति 'लज्जाजनक' रहेको बताए।

प्रधानमन्त्रीले कसैलाई खुसी पार्न यस्तो अभिव्यक्ति दिएको ओलीको आरोप छ। 'यही संविधानअनुसार प्रधानमन्त्री बनेको र यसैको शपथ लिएको व्यक्तिले अप्रासंगिकरुपमा संविधानको कुरा उठाउनुभयो,' ओलीले भने, 'यस्तो भन्नु त राम्रो हुँदैन, कटु शव्द के प्रयोग गर्नु, तर उहाँले कसलाई खुसी पार्न यस्तो प्रसंग उठाउनुभयो?' यसले केही दिनअघिमात्रै संसदले लिएको निर्णयको समेत धज्जी उडाएको ओलीको भनाइ छ।

प्रधानमन्त्री देउवाले भारतीय समकक्षी नरेन्द्र मोदीसँगको भेटपछि बिहीबार आयोजित संयुक्त पत्रकार सम्मेलनमा संविधानको सर्वस्वीकार्यता बढाउन पहल गर्ने अभिव्यक्ति दिएका थिए। यसै प्रसंगमा ओलीले अघि भने, 'उहाँले गिडगिडाएर शर्मनाक ढंगले प्रभु मैले गर्न सकिनँ, कोशिस गरेको थिएँ। तर म गर्छु, त्यसका लागि वातावरण बनाइदिनुपर्‍यो भनेर याचना गर्नुभयो,' ओलीले भने, 'उहाँको हाउभाउ र प्रस्तुति हेर्दा देशकै शिर निहुरिन्छ। अत्यन्तै दु:ख लागेको छ।'

प्रधानमन्त्री ओली प्रत्येक ६/६ महिनामा नियमित फलोअपका लागि थाइल्याण्ड जाने गरेका छन्। यसपटक भने चुनाव नजिकिएकाले बीचमा जान नपाइने सम्भावना रहेकाले साढे ३ महिनाको अवधिमा नै ओली थाइल्याण्ड गएको उनको सचिवालयले जनाएको छ। ओली आगामी बुधबार फर्किने कार्यक्रम छ। अनलाइन बाट