विराटनगर बसपार्क छ महिनामै बनिसक्ने

विराटनगर भदौ १२ गते । रातो तारा डट कम,
विराटनगर महानगरपालिका–११ मा रहेको पुरानो बसपार्क भएकै स्थानमा बन्दै गरेको नयाँ बसपार्क निर्माणको काम ६ महिना भित्र सकिने भएको छ । बसपार्क निर्माणको काम यतिबेला धमाधम भइरहेको छ ।

गत पुस महिनामा शिलान्यास भएर निर्माण सुरु भएको बसपार्क टर्मिनलको काम अहिलेसम्म ५० प्रतिशत सकिएको महानगरपालिकाले जनाएको छ । नगर विकास कोषको ८ करोड ४७ लाख ऋण सहयोगमा निर्माणाधिन बसपार्कको सोमबार विराटनगर महानगरपालिकाका प्रमुख भीम पराजुली तथा उपप्रमुख इन्दीरा कार्कीले अनुगमन गर्नुभएको छ ।

प्रमुख पराजुली तथा उपप्रमुख कार्कीले ठेकेदारलाई चाडै काम सक्न निर्देशन दिनुभयो । प्रमुख पराजुलीले बसपार्क निर्माणको काम सम्पन्न  भएपछि केहि हदसम्म नगरवासीलाइ राहत मिल्ने विश्वास व्यक्त गर्नुभयो ।

बसपार्कको सोमवार दोश्रो तल्लाको छत ढलान गरिएको छ । बसपार्कमा साना ठूला गरी ५७ वटा बस पार्किङ गर्न मिल्ने
छ । दुई तल्ले आधुनिक बस टर्मिनललाई अर्काे ब्यावस्था नभए सम्म बसपार्क कै रुपमा प्रयोग गरिने  छ ।

दुई तल्ले सुविधा सम्पन्न बस टर्मिनलनमा ब्यवस्थित टिकट काउन्टर, यात्रु प्रतिक्षलय, रेष्टुरेन्ट, ब्यागेज राख्ने कोठा सहितको रहने छ ।