जिल्लाकै एक्ली काँग्रेसक‍ो महिला उम्मेदवार मन्त्री गुरुङ, भन्नुहुन्छ-समावेशी लोकतन्त्र रक्षाको यो लडाईं हो

अमृत बास्तोला/तेह्रथुम, कात्तिक, १७ गते । रातो तारा डट कम,नेपाली कांग्रेसकी केन्द्रीय सदस्य तथा भौतिक पुर्वाधार तथा यातायात राज्यमन्त्री सीता गुरुङले समावेशी लोकतन्त्रको रक्षाका लागि कांग्रेस प्रतिवद्ध रहेको बताउनु भएको छ ।

बिहिबार तेह्रथुमबाट सदरमुकाम म्याङलुङ्गमा प्रतिनिधि सभाका लागि उम्मेद्वारी दर्तापछि कोण सभामा बोल्दै राज्यमन्त्री गुरुङले जिल्लाको विकास निर्माण, आर्थिक समृद्धि, सडक, शिक्षा, सिंचाई र खानेपानी विकास, युवा र महिलाका मुद्धा उठान गर्न बताउनु भयो ।

समावेशी लोकतन्त्रको जगमा मात्रै समाजको विकास र आर्थिक समृद्धि सम्भव भएको भन्दै उनले यसपटकको प्रतिनिधि सभा तथा प्रदेश सभा चुनावमा नेपाली कांग्रेसलाई बहुमत दिन आम मतदातालाई आग्रह गरेको उल्लेख गर्नु
भयो ।

तेह्रथुम जिल्लामा झण्डै साढे दुई दशकदेखि बामपन्थी शक्तिहरुले नै शासन गर्दै आएको भन्दै राज्यमन्त्री गुरुङले उनीहरुले गरेका कार्यहरु सबैलाई छर्लङ्ग भएको बताउनु
भयो ।

दुई पटक समानुपातिकबाट सांसद हुँदा आफुले सबै समय जिल्लाको विकास र समृद्धिका लागि खर्चिएको सम्झँदै राज्यमन्त्री एक पटक मौका दिएर हेर्न आम मतदातालाई आग्रह गरिरहेको छ ।

नेतृ गुरुङले आगामी प्रतिनिधि सभा सदस्यको निर्वाचनका लागि जिल्लाबाट उम्मेदवारी दर्ता गराउनु भयो ।
‘मलाई केन्द्रिय समितिले महिला भन्दै समानुपातिकबाट सिट सुरक्षित गर्न भनेकै हो,’ नेतृ गुरुङले भन्नु भयो ।, ‘तर मैले कमसेकम म पछाडिको पुस्तालाई महिला र युवाले पनि गर्न सक्छन् भन्ने सोचको विकास गराउन प्रत्यक्ष उम्मेद्वारी दिएकी हुँ ।’

उहाँ जिल्लाकै एक्ली महिला उम्मेदवार पनि हुनुहुन्छ ।
उहाँ विरुद्ध बाम गठबन्धनका लागि नेकपा एमालेका भवानीप्रसाद खापुङसहित अन्य १० जना पुरुषहरुको उम्मेदवारी रहेको मुख्य निर्वाचन अधिकृतको कार्यालयले जनाएको छ ।