भुटान लाई ५–० गोलको अन्तरले हराउँदै त्रिभुवन आर्मी क्लब सेमिफाईनलको यात्रामा पग्यो

शिव भट्टराई - सुनसरी, माघ ८ गते । रातो तारा डट कम,
इटहरी रंगशालामा जारी मदन भण्डारी स्मृति इटहरी गोल्डकपमा डुक युनाइटेड एफ.सी भुटान लाई ५–० गोलको अन्तरले हराउँदै त्रिभुवन आर्मी क्लब काठमाडौले सेमिफाईनलको यात्रा तय गरेको हो ।

खेलको सुरुवातसँगै आक्रमक बनेको त्रिभुवन आर्मी क्लबका लागि पहिलो हाफको २० औं मिनेटमा पदम तामाङ्गले खाता खोलेका थिए । निकै कडा प्रतिस्पर्धाका साथ भएको खेलको पहिलो हाफको ४० औं मिनेटमा त्रिभुवन आर्मी क्लब काठमाडौका खेलाडी पदम तामाङ्गले पुनः १ गोल गर्दै आफ्नो टिमको पक्षमा २ गोल बनाएका थिए ।

दोश्रो हाफको १६ औं मिनेटमा आर्मीका दिनेश हेनजमले १ गोल थपे । आक्रमक बनेको भुटानले निकै मेहनत गरेपनी दोश्रो हाफको ३० औ मिनेटमा त्रिभुवन आर्मी क्लब काठमाडौका खेलाडी टंक बस्नेतले १ गोल थपेर आफ्नो टिमको पक्षमा ४ गोल बनाए । खेलको ३४ औ मिनेटमा आर्मीका पदम तामाङ्गले पुनः १ गोल गरेर जित दिलाएका थिए ।

आजको खेलको म्यान अफ द म्याच त्रिभुवन आर्मी क्लब काठमाडौंका पदम तामाङ्ग घोषित भए । उनले नगद १० हजार र ट्रफी प्राप्त गरेका छन् । क्वाटर फाईनल अन्तर्गतको अन्तिमखेल मंगलबार आयोजक राष्ट्रिय जागृती क्लब इटहरी र गरिफा स्पोर्टिङ क्लब कोलकता बिच हुने आयोजक आयोजक राष्ट्रिय जागृती क्लब इटहरीले जनाएको छ ।