क्याम्पसले दक्ष जनशक्ति उत्पादन गर्नुपर्छ: मुख्यमन्त्री

उर्लाबारी, चैत ११ गते । रातो तारा डट कम,१ नम्बर प्रदेशका मुख्यमन्त्री शेरधन राईले सामुदायिक क्याम्पसले दक्ष जनशक्ति उत्पादन गर्न केन्द्रित हुनु पर्ने बताएका छन् ।

सनिवार उर्लाबारी बहुमुखी क्याम्पसको १८ औँ क्याम्पससभा तथा ३० औँ वार्षिकोत्सव कार्यक्रमलाई सम्बोधन गर्दै मुख्यमन्त्री राईले नयाँ बिषय समावेस गरी सामुदायिक क्याम्पसले दक्ष जनशक्ति उत्पादन गर्नेमा केन्द्रीत हुनुपर्नेमा जोड दिएका हुन् ।

प्रदेश सरकार कानून निर्माण गर्ने चरणमा रहेको बताउँदै मुख्यमन्त्री राईले त्यसपछि नीति तथा कार्यक्रम र बजेट निर्माण गरेर अघि बढ्ने जानकारी दिए । प्रदेश नं १ पर्यटन, कृषि, धार्मिक, व्यापारलगायत सबै क्षेत्रमा अब्बल रहेको बताउँदै मुख्यमन्त्री राईले अब योजनाबद्ध रुपमा नयाँ पूर्वाधार खडा गरेर नमूना प्रदेश बनाउने बताए ।

मुख्यमन्त्री राईले जनताले चाहेको समृद्धिको चाहना अब पूरा गर्नुको विकल्प नरहेको बताउँदै तीनवटै तहका सरकारबीच सहकार्य गरेर समृद्धि र विकासको बाटोमा अघि बढ्नुपर्ने बताए ।

कार्यक्रममा विभिन्न क्षेत्रमा योगदान पु¥याउने मानबहादुर फागो, गंगाप्रसाद बाँस्तोला, अग्रज पत्रकार दुर्गाप्रसाद भट्टराई, जीवनाथ लुइँटेल, शिवप्रसाद ढकाल र तेजेन्द्र दुलाललाई सम्मान गरिएको थियो ।

कार्यक्रममा क्याम्पस प्रमुख भीमप्रसाद लामिछानेले क्याम्पसको प्रगति प्रतिवेदन प्रस्तुत गर्नुभएको थियो भने क्याम्पस सञ्चालक समितिका अध्यक्ष योगेन्द्रबहादुर थापाको अध्यक्षतामा सम्पन्न भएको थियो । खबर पूर्वाञ्चलबाट