थ्रि स्टार ललितपुर सेमिफाईनलमा प्रवेश

गाईघाट,बैशाख ३१ गते । रातो तारा डट कम,
उदयपुरमा जारी पाँचौ रमपम गोल्डकप फुटबल प्रतियोगितामा थ्रि स्टार ललितपुर सेमिफाईनलमा प्रवेश गरेको छ । सोमबार भएको खेलमा मोरङ–११ लाई ४–१ गोलले पराजित गर्दै थ्रि स्टारले अन्तिम चारमा स्थान बनाएको छ । मोफसलमा यो सिजनमा ४ वटा उपाधि जितिसकेको थ्रि स्टारको जितमा मार्टिनले दुई र अनन्त तामाङ्ग र रुपेश केसीले एक,एक गोल गरे ।

थ्रि स्टारले खेलको ३२ औ मिनटमा गोल गर्न शुरु गरेको
थियो । टोलीको लागि पहिलो गोल मार्टिनले गरेका थिए । उनले रिवाउण्ड बलमा गोल गरेका थिए । मध्यान्तरपछि १३ औ मिनटमा मार्टिनले दोश्रो गोल गर्दै थ्रि स्टारले अग्रता दोब्बर बनाएको थियो । त्यसपछि रुपेश केसीले ८५ औ मिनटमा र अनन्त तामाङ्गले ८७ औ मिनटमा लगातार दुई गोल गर्दै थ्रि स्टारले ठूलो गोल अन्तरको जित हात पार्न सफल भयो ।

मोरङ–११ को तर्फबाट खेलको ५२ औ मिनटमा अफ्रिकी खेलाडी यमवालाले सान्त्वना गोल गरे । मोरङ विरुद्ध थ्रि स्टारले निकै शसख्त प्रदर्शन गरेको थियो । खेल अवधिभर थ्रि स्टार हावी भएको थियो । मोरङले केही अवसर सदुपयोग गर्न नसक्दा एक गोल मै चित्त बुझाउनु परेको थियो ।

खेलमा थ्रि स्टार अझ बढी गोल गर्ने अवसर गुमाएका थिए । मार्टिनका केही राम्रा प्रहारलाई मोरङको गोलरक्षकले विफल तुल्याएका थिए । प्रतियोगिताको म्यान अफ दि म्याच थ्रि स्टारका मार्टिन भए । उनले नगद ७ हजार हात पारे ।
मंगलबारको खेल विभागिय प्रहरी टोली काठमाडौं र सुनसरी–११ विच हुने । श्याम राई÷उदयपुर