१ नम्बर प्रदेशको नाम लिम्बूवान प्रदेश नाम राख्न माग गर्दै,लिम्बुवान समर्थकहरुले विराटनगरमा आज प्रदर्शन गरे

बिराटनगर भदौ ११ गते । रातो तारा डट कम,
प्रदेश नम्बर १ को नाम लिम्बुवान राख्नुपर्ने माग गर्दै लिम्बुवान समर्थकहरुले विराटनगरमा आज प्रदर्शन गरेका छन् ।

विभिन्न जिल्लाबाट आएका लिम्बूवान कार्यकर्ताले बिराटनगरको गणत्रान्त्रिक चोकबाट नारा लगाउदै एक नम्बर प्रदेश सभाको सचिवालय अगाडि पुगेर प्रदर्शन गर्दै, मुख्यमन्त्री शेरधन राईको राजीनामासमेत माग गरेका थिए ।

करिब १० वटा गाडीमा विराटनगर ओर्लिएका लिम्बुवान समर्थकहरु बजारमा मार्चपास गर्दै अस्पताल रोड पुगेका
 थिए । सुरक्षाकर्मीहरुले उनीहरुलाई अस्पताल मोडमै रोकेका छन् ।

प्रदर्शनमा सहभागीहरुले प्रदेश एकको नाम लिम्बुवान राख्नुपर्ने, बढ्दो महँगी रोक्नुपर्ने र कर्मचारीले समेत नटेर्ने मुख्यमन्त्री शेरधन राईले राजीनामा दिनुपर्ने माग गरेका छ्न ।

यसअघि किरात राईहरुले प्रदेश १ को नाम किरात राख्नुपर्ने माग गर्दै आएका थिए । प्रदेश १ को नाम सगरमाथा, कोशी या किरातमध्ये एक राख्नेबारेमा चर्चा चलिरहेका बेला लिम्बुवानको माग पनि अघि आएको हो ।