अपुग यात्रुको भाडा हवाइ कम्पनीलाई बाग्लुङ नगरपालिकाले तिर्ने

काठमाडौ कार्तिक १६ गते । रातो तारा डट कम,पर्वत-अपुग यात्रुको भाडा हवाइ कम्पनीलाई हर्जना स्वरुप तिर्दै आएको बाग्लुङ नगरपालिकाले बिहीबारको उडानमा ५६  हजार रुपैयाँ तिर्नुपर्ने भएको छ।

बाग्लुङको बलेवामा रहेको बलेवा विमानस्थल पुनः संचालन गर्न बाग्लुङ नगरपालिकाले हवाइ कम्पनीसँग उडानको क्रममा जति जना यात्रु अगुप हुन्छ हुन्छ, त्यस बापतको भाडा नगरपालिकाले तिर्ने सम्झौता गरेको छ। सम्झौताअनुसार एक उडानमा १२ जना यात्रु हुनुपर्ने छ। तर, बिहीबारको काठमाडौं–बलेवा उडानमा ११ र बलेवा–काठमाण्डौ उडानमा तीन जना मात्र यात्रु भए। दुवैतर्फ गरी अपुग १० जना यात्रुको हर्जना नगरपालिकाले व्यहोर्नु परेको हो।

विमान अभावका कारण करिब तीन महिना उडान रोकेको नेपाल एयरलाइन्सले चाडबाडको समयलाई लक्षित गरी असोज २५ देखि पुनः उडान सुरु गरेको हो। दशैंको समयमा नियमित उडानको अलावा साताको दुई उडान गर्ने वायु सेवा निगमले अनुमति दिएको भए पनि यात्रु अभावका कारण हुन नसकेको नागरिक उड्डयन कार्यालय बलेवाका प्रमुख सूर्यबहादुर खत्रीले जानकारी दिए। खत्रीका अनुसार नियमित उडान सुरु भए पनि दुवैतर्फ पर्याप्त यात्रु छैन।

अपुग यात्रुको हर्जना बाग्लुङ नगरपालिकाले व्यहोर्ने सहमति भएपछि २०७४ चैत ९ देखि विमानस्थलमा हवाइ सेवा सञ्चालनमा आएको हो। नगरपालिकाले अपुग यात्रुहरुको हर्जना तिर्नका लागि तारा एयर र नेपाल एयरलाइन्सलाई १०र१० लाख गरी २० लाख अग्रिम भुक्तानी गरेको छ। अहिलेसमम उक्त सम्झौता कायमै रहेको छ।

नेपाल एयरलाइन्सले हालसम्म १५ र तारा एयरले असारसम्म १२ वटा उडान भरेको छ। नगरपालिकाले हालसम्म अपुग भएका यात्रुहरुको भाडा ११ लाख रुपैयाँभन्दा बढी बुझाएको छ। नेपाल एयरलाइन्सको उडान भाडा प्रतियात्रु पाँच हजार ६०० कायम गरिएको छ भने तारा एयरका लागि छ हजार ७९५ रुपैयाँ रहेको छ।

२०१८ सालमा निर्माण भएको विमानस्थल पोखरा–बागलुङ राजमार्ग खुलेपछि २६ वर्षदेखि बन्द रहेको थियो। हवाइ जहाजबाट बलेवादेखी काठमाण्डौं ४५ मिनेटमा पुग्न सकिन्छ।
थाहा खबरबाट