पाहाडी जिल्लामा हिमपात—देशैभरी चिसो बढ्यो

काठमाण्डौं माघ ९  गते । रातो तारा डट कम,मौसममा बदली भएपछि देशका अधिकांश स्थानमा हिमपात परेको छ । सुदुरपश्चिम र कर्णाली प्रदेशका पाहाडी जिल्लाहरुमा हिमपातले जनजीवन कष्टकर बनेको छ । स्कूलहरु बन्द भएका छन ।

सडक यातायात पनि अवरुद्ध भएको छ । सुदूरपश्चिमका बैतडी, बाजुरा, डडेलधुरा, बझाङ, अछाम लगायतका जिल्लाहरुमा बाक्लो हिमपात परेको छ । यस्तै, कर्णालीको हुम्ला, जुम्ला सहितका जिल्लामा पनि हिमपात भएको छ ।

हिमपातका कारण जनजीवन प्रभावित बनेको छ । गए रातिदेखि हिमपात हुनुको साथै हावाहुरी चलिरहेका कारण जनजीवन प्रभावित भएको छ । हिमपातका कारण सवारी साधन आवतजावत अवरुद्ध बनेको छ भने बजार पनि सुनसान बनेका छन् ।

हिमपातले हुम्ला जिल्ला सदरमुकाम सिमकोट देखि उत्तरी क्षेत्रका सबै गाउँको तापक्रम माइनसमा पुग्नुको साथै मुचुमा अहिले झण्डै दुई फिटभन्दा बढि हिउँ जमेकाले स्थानीयलाई घरबाट बाहिर निस्कन समेत समस्या भएको छ । यता, बाजुरामा एक दशक भन्दा बढी सयम पछि बाजुराका बेसितिरका क्षेत्रमा समेत हिमपात भएको छ ।

बाजुराका हिमाली क्षेत्रमा हिमपात हुने गरे पनि १२ बर्ष पछि पहिलो पटक कर्णाली किनारासम्मै हिमपात भएको कुरा त्यहाँका मानिसहरुले बताएका छन ।