सवारी दुर्घटना १ को मृत्यु २ घाईते

सुनसरी माघ १९ गते । रातो तारा डट कम,सुनसरीको २ छुट्टाछुट्टै स्थानमा भएको सवारी दुर्घटनामा परी १ जनाको मृत्यु भएको छ भने २ जना गम्भीर घाईते भएका छन् ।

शुक्रवार बेलुका ९:२० बजेको समयमा धरानबाट पानमारा जाँदै गरेको को १९ प १२३८ नम्बरको मोटरसाईकलले पैदल यात्री धरान ५ बस्ने बर्ष ५३ को जित बहादुर लिम्बुलाई ठक्कर दिंदा लिम्बु गम्भीर घाईते भएका थिए ।

घाईतेलाई तत्काल उपचारको लागि बि.पि.कोईराला स्वास्थ्य बिज्ञान प्रतिष्ठान धोपा लगिएकोमा उक्त अस्पतालमा उपचार हुन नसकी थप उपचारको लागि बिराटनगरको नोवेल अस्पताल पठाईएको थियो । निजको उपचारकै क्रममा राती १२ बजे सोही अस्पतालमा मृत्यु भएको ईलाका प्रहरी कार्यालय धरानले जनाएको छ । मोटरसाईकल र चालक प्रहरीको नियन्त्रणमा रहेका छन् ।

यसैगरी सुनसरीकै देवागञ्जमा भएको दुर्घटनामा परी २ जना गम्भीर घाईते भएका छन् । शुक्रवार बेलुका ७ बजेको समयमा देवानगञ्जबाट बिराटनगर तर्फ जाँदै गरेको  को ३ प १५७० नम्बरको मोटरसाईकलले बिपरीत दिशाबाट आउँदै गरेको साईकललाई ठक्कर दिंदा साईकल चालक देवानगञ्ज-६ का १९ बर्षीय सुधिर मेहेता र मोटरसाईकल चालक देवानगञ्ज-३ का १९ बर्षीय मिथ्लेश यादव गम्भीर घाईते भएका हुन् ।

घाईते दुवै जनाको बिराटनगर स्थित गोल्डेन अस्पतालमा उपचार भईरहेको ईलाका प्रहरी कार्यालय देवानगञ्जले जनाएको छ ।