क्रिकेटमा ऐतिहासिक जित हासिल गरेको नेपाली क्रिकेट टोली आज स्वदेश फर्कदै

काठमाण्डौं,माघ २१ गते । रातो तारा डट कम,घरेलु टोली संयुक्त अरब इमिरेट्स (युएई) विरुद्धको एकदिवसीय र टी–ट्वान्टी अन्तर्राष्ट्रिय क्रिकेट सिरिज जितेको नेपाली राष्ट्रिय क्रिकेट टोली आज स्वदेश फर्कदै छ ।

नेपाली राष्ट्रिय टोलीका टिम व्यवस्थापक रमन शिवाकोटीका अनुसार ऐतिहासिक सिरिज विजेता नेपाली टोली आज अपरान्ह नेपाल आईपुग्ने कार्यक्रम रहेको छ । नेपाली टोली फ्लाई दुबई विमानबाट अपरान्ह ३ः२० बजे त्रिभुवन अन्तर्राष्ट्रिय विमानस्थलमा आइपुग्नेछ ।

घरेलु टोली युएईविरुद्ध नेपालले तीन खेलको एकदिवसीय र टी–ट्वान्टी सिरिज समान २–१ ले जितेको थियो । दुवै सिरिजको सुरुवाती खेल गुमाएपनि उत्कृष्ट पुनरागमन गर्दै नेपालले दुई सिरिज जित्दै पहिलो पटक ऐतिहासिक बनाएको छ ।

आईसीसीबाट एकदिवसीय अन्तर्राष्ट्रिय मान्यता पाएपछि नेपालले युएई विरुद्ध दोस्रो एकदिवसीय सिरिज खेलेको हो ।