विस्फोटमा ज्यान गुमाउनेलाई सरकारले राहत र घाइतेको उपचार खर्च दिने

काठमाण्डौ,फागुन १२ गते । रातो तारा डट कम,गृहमन्त्री रामबहादुर थापाले ललितपुरको नक्खुमा बम विस्फोटमा परी मृत्यु भएकाका परिवारलाई सरकारले राहत दिने र घाइतेको उपचार खर्च व्यहोर्ने बताउनु भएको छ ।

बम विस्फोटबाट घाइते भएकालाई भेट्न भैँसेपाटीस्थित मेडिसिटी अस्पताल पुग्नु भएका  गृहमन्त्री थापाले उपचारको सम्पूर्ण जिम्मेवारी सरकारले लिने बताउनु भएको हो । घटनामा संलग्न दोषीलाई कडा कारबाही गरिने प्रतिबद्धता पनि उहाँले जनाउनुभयो ।

अस्ती साँझ एनसेलको कार्यालयअगाडि बम विस्फोट हुँदा तीनजना घाइते भएका थिए । घाइतेमध्ये उपचारका क्रममा एकजनाको गएराति मृत्यु भएको थियो ।

यसैबीच शृङ्खलाबद्ध आगजनी र बमविस्फोटमा संलग्न भएको आशंकामा प्रहरीले नेत्र विक्रम चन्द ‘विप्लव’ नेतृत्वको नेकपाका १८ कार्यकर्तालाई पक्राउ गरेको छ ।

भैरहवा, रौतहट पोखरा, काभ्रे, बाग्लुङ र पूर्वी नवलपरासीमा रहेका केही एनसेल टावरमा गएराति आगजनी भएको थियो । नेपाल प्रहरीका प्रवक्ता एसएसपी उत्तमराज सुवेदीले अहिलेसम्म १८ जनालाई नियन्त्रणमा लिएर अनुसन्धान भइरहेको जानकारी दिनुभयो ।