दोस्रो मेयर गोल्डकप उद्घाटन

मोहन कुमार राई-संखुवासभा, चैत्र २४ गते । रातो तारा डट कम, संखुवासभाको चैनपुरको रंगशालामा उद्घाटन गरिने भनिएको १ नं. प्रदेश स्तरीय दोस्रो मेयर गोल्डकप फुटवल प्रतियोगिता खराब मौसका कारण लगातार बर्षा भएपछि अन्ततःउद्घाटन गर्ने भनिएको एक दिन पछि आइतबार विहान ९ बजे उद्घाटन गरिएको छ ।

“खेलकुद मार्फत पर्यटन,पहिचान, प्रगति र गरीमाः समृद्धि र एकताको लागि फुटवल चैनपुर नगरीमा” भन्ने मुल नाराका साथ आज भव्यताकासाथ उक्त फुटबल प्रतियोगिता  उद्घाटन गर्दै संघिय सांसद राजेन्द्र प्रसाद गौतमले खेलकुदका माध्यमबाट संखुवासभालाई प्रदेश नं. १ मा स्थापितगर्न र   पर्यटन प्रवर्दधनका निम्ति यो फुटबल प्रतियोगिता  उपयोग सिद्ध हुने धारणा राख्नुभयो ।

उद्घाटनको क्रममा गौतमले भन्नुभयो देशका ३ वटै तहका सरकारहरुले युवाहरुको चाहना र भावनालाई समेटदै खेलकुदका माध्यमबाट देशलाई प्रगति र समृद्धिको बाटोमा लान र युवाहरुलाई विदेश पलायन हुनबाट रोक्न यो खेल प्रतियोगितले महत्वपूर्ण भूमिका खेल्ने समेत वताउनुभयो ।

कार्यक्रममा राजनीतिक दलका नेताहरु, सरकारी कार्यालयका प्रमुख प्रतिनिधिहरु लगायतको उल्लेखिय उपस्थितिमा रहेको थियो । कार्यक्रमलाई मूल आयोजक समितिका सहसंयोजक एवं चैनपुर नगरपालिकाका उप प्रमुख मुना श्रेष्ठले खेलाडीहरु एवं पाहुना दर्शकहरुलाई शब्दद्धारा स्वागत गर्नुभएको उक्त प्रतियोगिताको उद्घाटन सत्रको सभापतित्व खेल आयोजक समितिका संयोजक एवं चैनपुर नगरपालिकाका प्रमुख भरतकुमार खत्रीले गर्नुभएको थियो ।

अघिल्लो दिन  मौसमसँगै लगातार परेको पानीले खेलमैदान जलमग्न भएपछि  आयोजक समितिले खेल स्थगन गर्दै आज विहान सबेरैबाट खेल मैदानलाई चुस्त र दुरुस्त राखेर खेलकुद प्रतियोगितालाई शुरुवात गराएको हो । आज भएको पहिलो चरणको खेलमा धनकुटा नगरपालिका र खाँदवारी नगरपालिका वीच भएको प्रतिस्पर्धामा खाँदवारी नगरपालिकाले सुन्यको विरुद्ध १ गोलको अन्तरले जित हात पार्न सफल भएको छ   ।

खेल समय सकिनु २ मिनेट अघि ८८ औ मिनेटमा जर्सी नंं ४ का खेलाडी सुवास तामाङले गोल गरेर खाँदवारी नगरपालिकालाई जिताउन सफल भएका हुन । प्रदेश नं. १ स्तरीय यो खुल्ला पुरुष फुटवल प्रतियोगितामा सहभागी हुन विभिन्न नगरपालिकाबाट राष्ट्र तथा  अन्तराष्ट्रिय स्तरका खेलाडीहरु यतीखेर  चैनपुर बजारको खेलमैदान रंगशालामा देखिएका छन् । 

खेलप्रतियोगितालाई हेर्न जिल्लाका विभिन्न भाग लगायत छिमेकी जिल्लाहरुबाट समेत उल्लेखिय संख्यामा दर्शकहरुको भिडलागेको छ । विहान सबेरैबाट संखुवासभाको रंगशाला आसपास क्षेत्रमा विभिन्न भागबाट आएका मानिसहरु देशी विदेशी खेलाडीहरुको खेल हेर्न उत्सुकताका साथ जुटेकोछन्।

आयोजकका अनुसार यतिखेर खेलमैदानमा  नाइजेरियन तथा अफ्रीकन मुलकबाट समेत खेलाडीहरुलाई समावेश गरेर नगरपालिकाहरु प्रतिस्पर्धा गरिरहेका छन् आसपासमा अस्थायी रुपमा राखिएको होटल व्यवसायीहरुको सामाग्रीहरु भिजेर नष्ट भएको छ ।

खेलमा संखुवासभाका ५ नगरपालिका सहित प्रदेश नं. १ भरीका संखुवासभा सहित ९ वटा जिल्लाका विभिन्न नगरपालिकाका खेलाडीहरु खेलमा प्रतिस्प्रर्धा गर्नेगरी १३ वटा नगरपालिकाका खेल प्रतियोगितामा सहभागी भएका छन् । आजको दोस्रो चरणको खेल भोजपुर नगरपालिका र पाँचखपन नगरपालिका वीच खेल शुरु भएको छ ।

आज भएको पहिलो चरणको प्रतियोगितामा म्यान अफ द म्याच खाँदवारी नगरपालिकाका जर्सी नं. ४ का खेलाडी सुवास तामाङ घोषित भए सँगै आयोजकले उनलाई ५ हजार नगद सहित पुरस्कृत गरेको छ । चैनपुर नगरपालिकाको ३५ लाखको लागत र अन्य संघ संस्थाहरु सँग समेत चन्दा संकलन गरेर ४५ लाखको लागतमा यो फुटवल प्रतियोगिता चैत्र ३० सम्ममा सम्पन्न गर्ने आयोजक समितिले जनाएको छ ।

प्रतियोगितामा विजयी हुने नगरपालिकाकाहरुलाई प्रथम स्थान हासिल गर्ने टिमलाई ५ लाख ५५ हजार ५ सय ५५ , द्धितीय हुने टिमलाई ३ लाख ३३ हजार ३ सय ३३, तृतीय स्थान एवं सेमी फाइनलमा पराजित हुने टिमलाई १ लाख ११ हजार १ सय ११ रुपैया नगद सहित मेडल,कप र प्रमाणपत्रले पुरस्कृत गरिने समेत जनाइएको छ ।

यसैगरी सर्वोत्कृष्ट खेलाडीलाई
रु.१५ हजार, उत्कृष्ट गोलरक्षकलाई १० हजार र प्रत्येक खेलमा म्यान अफ द म्याच घोषित खेलाडीलाई ५ हजार नगद सहित पुरस्कृत गरिने जनाइएको छ । यस अघि भएको प्रथम मेयर गोल्डकप प्रतियोगिता खाँदवारी नगरपालिकाले जित हासिल गर्न सफल भएको थियो ।