पुलिस र एपीएफको लगातार दोस्रो जित हात पार्यो

काठमाण्डौ जेष्ठ २२ गते । रातो तारा डट कम,विभागीय टिम नेपाल पुलिस क्लब र एपीएफ क्लबले चौथो संस्करणको प्रधानसेनापति राष्ट्रिय पुरुष भलिबल प्रतियोगितामा लगातार दोस्रो जित हासिल गरेको छ ।

लगनखेलस्थित सैनिक शारीरिक तालिम तथा खेलकुद केन्द्रमा हिजो पुलिसले प्रदेश ५ लाई ३–० को सेटमा पराजित गरेको हो । पुलिसले प्रदेश ५ माथि २६–२४, २५–१५ र २५–१७ को सेटमा पराजित गर्यो । जितसंगै समूह ’ख’ को पुलिसले २ खेलबाट ६ अंक जोडेको छ भने समूहको दोस्रो स्थानमा रहेको छ ।

प्रदेश ५ को यो लगातार दोस्रो हार हो । समूह क बाट लगातार दोस्रो जित निकाल्ने क्रममा एपीएफले सुदुरपश्चिम प्रदेशलाई ३–० को सोझो सेटमा पराजित गरेको छ । एपीएफले सुदुरपश्चिममाथी २५–१७, २५–८ र २५–१७ ले हराएको हो । यो जितसंगै समूहको दोस्रो स्थानमा रहेको एपीएफले २ खेलबाट ६ अंक जोडेको छ ।