मोटरसाईकल दुर्घटना १ को मृत्यु ३ घाईते

झापा, जेष्ठ २५ गते । रातो तारा डट कम,झापाको बिर्तामोड नगरपालिका-२ रामचोकमा भएको मोटरसाईकल दुर्घटनामा १ जनाको मृत्यु भएको छ भने ३ जना घाईते भएका छन् ।

आज बिहान १० बजेको समयमा पश्चिमबाट पूर्व तर्फ आउँदै गरेको को १ च ६२१९ नम्बरको कारलाई सोही दिशाबाट आउँदै गरेको को ११ प ६३३७ नम्बरको मोटरसाईकलले ओभरटेक गर्ने क्रममा बिपरीत दिशाबाट आउँदै गरेको मे १० प ५१९९ नम्बरको मोटरसाईकलसंग ठोक्किदा दुवै मोटरसाईकलमा सवार ४ जना गम्भीर घाईते भएका थिए ।

 घाईतेहरुलाई उपचारको लागि तत्काल बिर्तामोडकै बि.एण्ड.सी. अस्पताल लगिएकोमा उपचारकै क्रममा ६३३७ नम्बरको मोटरसाईकल चालक गौरादह नगरपालिका-५ का ३० बर्षीय टेकनाथ घिमिरेको बिहान ११:५० मा मृत्यु भएको ईलाका प्रहरी कार्यालय अनारमनीले जनाएको छ भने सोही मोटरसाईकलको पछाडी सवार गौरादह नगरपालिका-४ की ३१ बर्षीया यमुना देवी न्यौपाने, मे १० प ५१९९ नम्बरका मोटरसाईकल चालक दमक नगरपालिका-१५ का २० बर्षीय जिवन भण्डारी र सोही मोटरसाइकलको पछाडी सवार दमक नगरपालिका-९ का २३ बर्षीय कर्म उरावको सोही अस्पतालमा उपचार भईरहेको उक्त कार्यालयले जनाएको छ ।

दुर्घटनामा को १ च ६२१९ नम्बरको कारमा समेत सामन्य क्षति भएको छ भने ३ वटै सवारी साधन ईलाका प्रहरी कार्यालय अनारमनीको नियन्त्रणमा रहेका छन् ।