ओली सरकार एकदलीय अधिनायकवादी भएकाले असफल भयो–सभापति देउवा

काठमाण्डौ असोज १२ गते । रातो तारा डट कम, नेपाली काँग्रेसका सभापति तथा,प्रमुख प्रतिपक्ष दलका नेता शेरबहादुर देउवाले, केपी ओली नेतृत्वको वर्तमान सरकार नेपालको इतिहासमै सबैभन्दा असफल सावित भइसकेको दावी गर्नुभएको छ । 

वडा दशैंको अवसर पारेर पार्टीले काठमाण्डौंमा आयोजना गरेको एक कार्यक्रममा उहाँले जनता, उद्योगी, व्यापार सबै ओली नेतृत्वको वर्तमान सरकारसँग आजित भइरहेको दावी पनि गर्नुभयो । पूर्वप्रधानमन्त्री समेत रहनुभएका सभापति देउवाले व्यापारीलाई आजित बनाउने गरी कर बढाएको, जनतालाई दशैंमा सामान किनमेल गर्न समेत नसक्ने गरी महंगी बढाउने काम सरकारले गरेको भन्दै, आक्रोश पनि व्यक्त गर्नुभयो । 

सभापति देउवाले सरकारले एकदलीय अधिनायकवादी सर्वसत्तावाद लाद्न प्रजातन्त्र विरोधी कानुन बनाउने प्रयास गरिरहेको आरोप लगाउनुभयो । देउवाले प्रजातन्त्र विरोधी सरकारका कुनै पनि गतिविधि सैह्य नहुने चेतावनी दिनुभयो । उहाँले पार्टी भित्रको अन्तरघातकै कारण निर्वाचनमा हार व्यहोर्नु परेको उल्लेख गर्दै अन्तर घात मुक्त पार्टी निर्माणमा जुटन पनि पार्टीका नेता, कार्यकर्तालाई आह्वान गर्नुभयो ।