दूई महिना भन्दा बढी समय नाघेको १ सय ७० बोरा मैदा नष्ट

काठमाण्डौ मंसिर ११ गते । रातो तारा डट कम,पाँचखालमा म्याद गुज्रेका ८ हजार ५ सय केजी (१ सय ७० बोरा) मैदा नष्ट गरिएको छ । पाँचखाल नगरपालिका वडा नम्बर ४ तामाघाट समाजकल्याण चोकमा रहेको राजाराम श्रेष्ठले सञ्चालन गर्दै आएको माँ पलाञ्चोक भगवती धन्द्रे भिमसेन बेकरी उद्योगमा रहेको म्याद गुज्रेका उक्त परिमाणको मैदा हिजो खाल्डो खनेर पुरिएको हो । काभ्रेका सहायक प्रमुख जिल्ला अधिकारी लक्ष्मी देवी हुँमागाईको नेतृत्वमा रहेको टोली सहित घरेलु तथा साना उद्योग कार्यालय, खाद्य प्रविधि तथा गुणनियन्त्रण डिभिजन कार्यालय काभ्रे, पाँचखाल नगरपालिका प्रतिनिधि र पाँखाल उद्योग वाणिज्य संघको संयुक्त टोलीले गत कात्तिक ६ गते गरिएको बजार अनुगमनको क्रममा उद्योगको गोदाममा म्याद नाघेको मैदा प्रयोग गरेको पाईएपछि शिल गरिएकोथियो । उत्पादन भएको मितिले ४५ दिन भित्रमा प्रयोग गर्नुपर्नेमा बेकरी उद्योगमा दूई महिना भन्दा बढी समय नाघेको १ सय ७० बोरा मैदा भेटिएको थियो ।