महिला भलिबल प्रतियोगिता पुस २३ गतेबाट सुरु हुने

काठमाण्डौ पुस १४ गते । रातो तारा डट कम,तेस्रो संस्करणको न्यू डाइमण्ड कप राष्ट्रिय खुला महिला भलिबल प्रतियोगिता पुस तेस्रो साताबाट सुरु हुने भएको छ । आज पत्रकार सम्मेलन गर्दै आयोजक न्यू डाइमण्ड स्पोर्ट्स क्लबले प्रतियोगिता पुस २३ गतेबाट २६ गतेसम्म हुने जानकारी गराएको हो ।

प्रतियोगितामा ६ देखि ८ टिमको सहभागिता रहने आयोजकले जनाएको छ । टिमको तय भने केहि दिनमा हुनेछ । प्रतियोगिताको पुरस्कार राशी बढाइएको प्रतियोगिताका संयोजक कुमार राईले जानकारी दिनुभयो । यस संस्करणको विजेताले ४ लाख १ सय १ रुपैयाँ पाउने छन् । गत वर्ष विजेताले ३ लाख १ हजार पाएका थिए ।
उपविजेताले ३ लाख १ सय १, तेस्रोले १ लाख ५१ हजार १ सय १ र चौंथोले ५१ हजार १ सय १ रुपैयाँ पाउने छन् । प्रतियोगिताको सर्वोकृष्ट खेलाडीले २१ हजार १ सय पाउने छन् । प्रतियोगिता काठमाडौँको नयाँ बसपार्कस्थित ढोरपाटन भलिबल क्लबको मैदानमा हुनेछ ।