माध्यामिक बिद्यालयमा स्थानीय अभिभावकहरुले तालाबन्दी गरे

काठमाण्डौ माघ १६ गते । रातो तारा डट कम,बझाङ्गको जयपृथ्वी नगरपालिका–१ कैलासमा रहेको नारायण माध्यामिक बिद्यालयमा स्थानीय अभिभावकहरुले तालाबन्दी गरेका छन् ।  शिक्षकले विद्यालय हाता भित्रै मदिरा सेवन गरेको भन्दै विज्ञप्ती जारी गरेर स्थानीयले बिद्यालयमा  तालाबन्दी गरेका हुन् ।  

विद्यालयका सह–प्रधानाध्यापक गङ्गो बहादुर सिँह लगाएतका ५ जना शिक्षकले सामुहिक रुपमा बिद्यालय हाता भित्रै मदिरा सेवन गरेको स्थानीयले बताएका छन् । हिजो दिउँसो शिक्षकहरुले एक बिद्यार्थीलाई बजारबाट मदिरा ल्याउन लगाएको र अन्य बिद्यार्थीलाई विद्यालय समयभन्दा अगाडीनै घर पठाएको स्थानीयको आरोप छ ।  

सरकारी नियम अनुसार ४ बजे बिद्यालय बन्द गर्नु पर्ने भए पनि शिक्षकहरुले बिद्यालयमै मदिरा सेवन गर्न हिजो दिँउसो २ बजेनै बिद्यालय बन्द गरेको स्थानीय अभिभावकको भनाइ छ ।  शिक्षकहरुले  विद्यालय हाता भित्रै मदिरा सेवन गर्दा बिद्यार्थीको पठन पाठनमा समस्या भएको र विद्यार्थीको भविष्यमाथि खेलवाड भएको स्थानीयले किालेको विज्ञप्तीमा उल्लेखछ ।

विद्यालयमा अध्ययनरत विद्यार्थीहरुले पनि शिक्षकले विद्यालय भित्रै मदिरा सेवन गरेको बताएका छन् । सह प्रधानाध्यापक सिँहले भने विद्यालयमा कुनै अनैतिक क्रियाकलाप नगरेको बताउनुभयो । उहाँले विद्यालय समयमै छुट्टी गरेको र मदिरा सेवनको आरोप झुटो भएको दाबी गर्नुभयो ।