पुलिस क्लबलाई हराउँदै मच्छिन्द्र क्लब फुटबल खेलको दोस्रो स्थानमा

काठमाण्डौ माघ ८ गते । रातो तारा डट कम,नेपाल पुलिस क्लबलाई हराउँदै मच्छिन्द्र क्लब जारी शहिद स्मारक ए डिभिजन लिग फुटबलको उपाधि होडमा फर्किएको छ । दशरथ रंगशालमा आज भएको खेलमा मच्छिन्द्रले पुलिसलाई १–० गोलले पराजित गरेको हो । मच्छिन्द्रका रन्जित धिमालले ५३ औँ मिनेटमा गरेको गोल निर्णायक बनेको हो ।

अघिल्लो खेलमा हिमालयन शेर्पा क्लबसँग २–० गोलले पराजित भएपछि निराश बनेको मच्छिन्द्र पछिल्लो जितपछि शीर्षस्थानमा रहेको नेपाल आर्मीसँग अंक बराबरी गर्न सफल भएको छ । दुवै टोलीको समान १६ अंक छ । तर मच्छिन्द्रले एक खेल बढी खेलेको छ । मच्छिन्द्रले आठ खेलमा पाँच जित, दुई बराबरी र एक हारको नतिजा निकालेको छ । 

सात खेल खेलेको नेपाल आर्मीको पाँच जित, एक बराबरी र एक हार छ । तेस्रो स्थानमा रहेको साविक विजेता मनाङ मस्र्याङ्दीको सात खेलबाट १३ अंक छ । आठ खेलबाट ११ अंक भएको पुलिस पाँचौँ स्थानमा रहेको छ ।