कोभिड १९ बाट बच्न स्वस्थ खानपान र जीवनशैली अपनाउन चिकित्सकहरूले दिए सुझाव

काठमाण्डौ चैत १८ गते । रातो तारा डट कम,कोरोना भाइरस अर्थात् कोभिड १९ बाट बच्नको लागि स्वस्थ खानपान र जीवनशैली अपनाउन चिकित्सकहरूले सुझाव दिएकाछन् । आन्तरिक शक्ति अर्थात रोग प्रतिरोधात्मक क्षमता जति बलियो भयो उति नै कोरोना भाइरससँग लड्न सजिलो हुने भएकाले आफूलाई स्वस्थ राख्न स्वास्थ्यकर्मीहरूले सुझाव दिएका हुन् । सीआईएनसँग कुरा गर्दै जनस्वास्थ्य विज्ञ डा. रवीन्द्र पाण्डेले आफूलाई स्वस्थ राख्न सन्तुलित खाना र व्यायाममा ध्यान दिनुपर्ने बताउनुभयो । चिकित्सकका अनुसार घरमा नै रहेको साग, पात, गेडागुडी, कोदो, गहँु, फापर जस्ता खानालाई समय मिलाएर खाने, पानी प्रशस्त पिउने तथा आराम गर्ने र आवश्यक व्यायामलाई निरन्तरता दिने हो भने आफूलाइ स्वस्थ राख्न सकिन्छ । घरमा बस्दा आफूलाइ घरभित्रकै काममा व्यस्त राख्ने, सरसफाइमा ध्यान दिने र सन्तुलित आहार खाने गर्दा रोगसँग लड्ने क्षमता बढ्न सक्ने डा. पाण्डेले बताउनुभयो ।