निजी प्रयोगशालाले पनि कोभिड परीक्षण गर्न पाउने

काठमाण्डौ बैशाख १६ गते । रातो तारा डट कम,अब निजी प्रयोगशालाले पनि कोभिड परीक्षण गर्न पाउने भएका छन् । स्वास्थ्य तथा जनसंख्या मन्त्रालयले गरेको नियमित पत्रकार सम्मेलनका क्रममा प्रवक्ता डा. विकास देवकोटाले कोभिड परीक्षणका लागि प्रयोगशालाको न्यूनतम मापदण्डको निर्देशिका जारी गरेको बताउनुभयो । अब निजी प्रयोगशालाले पनि कोभिड १९ को परीक्षणका लागि बाटो खुलाभएको डा. देबकोटाले जानकारी दिनुभयो । सञ्चालन मापदण्ड पूरा गर्ने प्रयोगशालाले मन्त्रालयबाट छुट्टै अनुमति लिनुपर्ने छ । मन्त्रालयका अनुसार आजसम्म कोरोना संक्रमितको संख्या ५२ रहेको छ । जसमा १६ जना निको भएका छन् । आजसम्म नेपालमा आरडीटी विधिबाट ४३ हजार ६३ नमुना परीक्षण भएका छन् भने पीसीआर विधिबाट १० हजार ४ सय ७१ परीक्षणहरु भएका छन् । दुवै विधिबाट ५३ हजार ५ सय ३४ वटा परीक्षणहरु भएका पनि देबकोटाले जानकारी दिनुभयो । त्यसैगरी आजको आइसोलेसनमा देशभरी १०६ जना रहेका छन् । काठमाडौँमा ८ जना आइसोलेसनमा छन् भने उपत्यका बाहिर ९८ जना रहेका छन् । क्वारेन्टाइनमा २० हजार १सय ९५ जना रहेका छन् ।