नेपालमा कोरोना सङ्क्रमितको सङ्ख्या नौ हजार पाँच सय ६१ पुगेको छ

काठमाण्डौ असार ८ गते । रातो तारा डट कम,नेपालमा गत २४ घण्टाको अवधिमा पाँच सय ३५ जना कोरोना सङक्रमित थपिएका छन् । स्वास्थ्य तथा जनसङ्ख्या मन्त्रालयले आज नियमित जानकारीका क्रममा पाँच सय ३५ जना नयाँ सङक्रमित थपिएका जनाएको छ । उनीहरु मध्ये चार सय ६१ जना पुरुष र ७४ जना महिला रहेका मन्त्रालयका प्रवक्ता डा. जागेश्वर गौतमले जानकारी गराउनुभयो । यो सँगै नेपालमा कोरोना सङ्क्रमितको सङ्ख्या नौ हजार पाँच सय ६१ पुगेको छ । कोरोना सङ्क्रमण निको भएर डिस्चार्ज हुनेको सङ्ख्या दुइ हजार एक सय ४२ रहेको छ । मन्त्रालयका अनुसार रसुवा बाहेक सबै जिल्लामा कोरोना सङ्क्रमण देखिएको छ ।