प्रादेशिक पत्रकारिता पुरस्कारबाट ४ जना पुरस्कृत

 विराटनगर असार ११ गते । रातो तारा डट कम,प्रदेश १ सरकारले ४ जना अग्रज पत्रकारलाई पुरस्कृत गरेको छ । राष्ट्रिय पत्रकारिता दिवसको अवसरमा वितरण गर्नेगरि प्रदेश सरकारले स्थापना गरेको प्रादेशिक पत्रकारिता पुरस्कार शुक्रबार वितरण गरिएको छ । पुरस्कृत हुनेमा झापा भद्रपुरका गोविन्दचन्द क्षेत्री, दमकका गञ्जबहादुर दाहाल, मोरङकी पत्रकार ललिता भट्टराई र उदयपुरका कौशल चेम्जोङ रहेका रहेका छन् । चारै जना अग्रज पत्रकारलाई मुख्यमन्त्री शेरधन राई र आन्तरिक मामिला तथा कानुन मन्त्री हिक्मत कार्कीले नगद एक–एक लाख रुपैयाँ प्रदान गर्नुभयो । प्रदेश सरकारले आर्थिक बर्ष २०७४–०७५ देखि प्रत्येक वर्ष दुई जनाको दरले अग्रज पत्रकारलाई पुरस्कृत गर्ने निर्णय गरेको थियो । कोरोना संक्रमणका कारण गत वर्ष र यो वर्षको एकमुष्ट गरी चार जनालाई पुरस्कार प्रदान गरिएको प्रादेशिक सञ्चार प्रतिष्ठानका कार्यकारी निर्देशक यज्ञ शर्माले बताउनुभयो । उहाँका अनुसार प्रादेशिक पुरस्कार हरेक वर्ष बैशाख २४ गतेका दिन वितरण गरिने छ ।