टोकियो ओलम्पिकमा नेपाली खेलाडीले प्रतिस्पर्धा गर्ने

काठमाण्डौ साउन १२ गते । रातो तारा डट कम, जापानमा जारी टोकियो ओलम्पिकमा आज नेपालका एक खेलाडीले प्रतिस्पर्धा गर्दैछन् । ओलम्पिक अन्तर्गत आज नेपालका पौडी खेलाडी एलेक्जेन्डर शाह (एलेक्स) ले प्रतिस्पर्धा गर्ने हुनु भएको छ । एलेक्सले पुरुषको १ सय मिटर फ्रीस्टाइलमा प्रतिस्पर्धा गर्नुहुनेछ । उहाँको खेल नेपाली समय अनुसार दिउँसो ३ ः ४५ मा सुरु हुनेछ । टोकियो एक्वेटिक सेन्टरमा हुने प्रतिस्पर्धामा एलेक्स हिट १ मा रहनुभएको छ । ७ खेलाडी रहेको यस हिटमा एलेक्स छैटौं लेनमा रहनुहुनेछ । एलेक्स रहेको हिट १ मा प्यालेस्टाइन, भुटान, माल्दिभ्स, कोसोभो, गुएना र सोलोमोन आइसल्याण्डका खेलाडी रहेका छन् । टोकियो ओलम्पिकमा पौडीबाट नेपालका दुई खेलाडीले प्रतिस्पर्धा गर्ने छन् । एलेक्ससँगै गौरिका सिंहले पनि प्रतिस्पर्धा गर्नु हुनेछ । गौरिकाको प्रतिस्पर्धा भने भोलि रहेको छ । गौरिकाले महिला १ सय मिटर फ्रीस्टाइलमै प्रतिस्पर्धा गर्नुहुनेछ । टोकियो ओलम्पिक खेलकुदमा सहभागिता जनाएका नेपालका सुटिङ र जुडो टोली आज नेपाल आईपुग्ने भएका छन् । नेपाल ओलम्पिक कमिटीले सुटिङ र जुडोका ७ सदस्सीय नेपाली टोली आज नेपाल आईपुग्ने जनाएको छ ।