बहुमूल्य रत्न आभूषणको उत्खनन र प्रशोधन गरी निकासी बढाउन सरकारको प्रतिबद्ध

काठमाण्डौ फागुन २३ गते । रातो तारा डट कम, सरकारले मुलुकभित्र उपलब्ध बहुमूल्य पत्थर उत्खननका लागि निजी क्षेत्रसँग सहकार्य गर्ने भएको छ । मुलुकभित्रका खानीको उत्खनन गर्दै बहुमूल्य रत्न आभूषणको प्रशोधन गर्दै निकासी बढाउन सरकार प्रतिबद्ध रहेको उद्योग वाणिज्य तथा आपूर्ति मन्त्रालयका सचिव अर्जुन प्रसाद पोखरेलले बताउनुभयो । सचिव पोखरेलले सरकारको नीति नै निजी क्षेत्रसँग सहकार्य वृद्धि गर्दै उत्पादन तथा निकासी वृद्धि गर्ने रहेकाले सहकार्यका लागि आग्रह समेत गर्नुभएको छ । नेपाल रत्न तथा आभूषण सङ्घको १७ औं साधारणसभाको उद्घाटन पछि सम्बोधन गर्दैै सचिव पोखरेलले अन्तर मन्त्रालय तथा निकायबीच समन्वयको अभावका कारण रत्न तथा आभूषण क्षेत्रलाई सरकारले पर्याप्त सम्बोधन र सहजीकरण गर्न नसकेको स्वीकार गर्नुभयो ।