कृषक समूहलाई ५० प्रतिशत अनुदानमा गहुँ र मकैको बिऊ वितरण

विराटनगर ÷ विराटनगर महानगरपालिकाले कृषक समूहलाई उन्नत जातको गहुँ र मकैको बिउ वितरण गरेको छ । महानगरले सशर्त कार्यक्रमअन्तर्गत ५० प्रतिशत अनुदानमा उन्नत जातको गहुँ र मकैको बिऊ वितरण गरेको हो ।

महानगरमा सोमबार आयोजित एक समारोहका बीच कृषक समूहका अध्यक्ष र प्रतिनिधिहरुलाई बिऊ वितरण गरिएको हो । खाद्यान्न बालीको बिऊ उपयोगमा अनुदान कार्यक्रमअन्तर्गत १४ हजार ६ सय केजी विजय जातको गहुँको बिऊ वितरण गरिएको कृषि विकास शाखा प्रमुख खगेश्वर तिम्सिनाले जानकारी दिनुभयो ।

कार्यक्रममा महानगरका मेयर नागेश कोइराला, उपमेयर शिल्पा निराला कार्की, आर्थिक विकास समितिका संयोजक श्याम घिमिरेलगाययतले कृषकलाई बिऊ वितरण गर्नुभएको थियो । समूहमार्फत वितरण गरिएको बिऊबाट ७ सय ७५ घरधुरी लाभान्वित हुनेछन् । सो बिऊले १२१ हेक्टर क्षेत्रफललाई पुग्नेछ । त्यस्तै ५० प्रतिशत अनुदानमा उन्नत मकैको बिऊ पनि वितरण गरिएको थियो । 

९ सय ९० केजी पाइनियर–३३५५ मकैको बिऊ वितरण गरिएको शाखा प्रमुख तिम्सिनाले जानकारी दिनुभयो । सो मकैको बिऊबाट ३७५ घरधुरी लाभान्वित हुने उहाँको भनाइ थियो । ११ लाख रुपैयाँ बराबरको गहुँ र १० लाख रुपैयाँ बराबरको मकैको बिऊ वितरण गरिएको तिम्सिनाले बताउनुभयो । यसरी वितरण गरिएको बिऊ समूहमा आबद्ध कृषकले प्राप्त गर्ने निमित्त प्रमुख प्रशासकीय अधिकृत दीपक पौडेलले बताउनुभयो ।