उदयपुर सिमेन्ट उद्योग यतिबेला बन्द हुने अबस्थामा पुग्दा पनि सरकार बेखबर ?

श्याम राई, उदयपुर  गाईघाट, २ भदौ | मुलुककै सबैभन्दा ठूलो उदयपुर सिमेन्ट उद्योग यतिबेला चरम आर्थिक अबस्थाबाट गुज्रिरहेको छ । आर्थिक अबस्था जर्जर रहेकै कारण उद्योगले बिगत केही बर्ष देखि नियमित रुपमा बिद्युतको महशुल्क बुझाई सकेको छैन ।

५ बर्ष अघि सम्म महशुल्क समयमा बुझाएर छुट समेत लिने गरेको उद्योगले अहिले करोड रुपैया बिद्युत महशुल्क नबुझाएको कारण जरिवाना तिर्नु परेको छ । बिद्युत प्राधिकरण गाईघाटले दिएको जानकारी अनुसार उद्योगले २०८१ श्रावण सम्म ६२ करोड ९९ लाख ३२ हजार रुपैया बिद्युतको महशुल्क बुझाउन बाकी रहेको छ । समयमै बिद्युत महशुल्क नबुझाउदा उद्योगलाई जरिवाना मात्र १२ करोड ५९ लाख ९६१ तिर्नु पर्ने भएको छ ।

प्राधिकरणले महशुल्क बुझाउन पटकपटक पत्र काटेर उद्योगलाई सचेत गराएको भए पनि उद्योगले बिद्युत महशुल्क नबुझाएको प्राधिकरण गाईघाटले जनाएको छ । हामीले केन्द्रलाई समेत जानकारी गराएर महशुल्क असुल्न खोजेका थियौ । तर सफल हुन सकेनौ । प्राधिकरणका कर्मचारी मधुकर थापाले भने ।

उद्याुगसँग पैसा नभएकोले बिद्युत प्रयोग गरे बापतको पैसा बुझाउन नसकेको जानकारीमा आएको उनले बताए । उद्योगको अबस्था अहिले निकै जर्जर रहेकोले महसुल्क बुझाउन नसकेको भन्ने जानकारी आएको उनले बताए । उद्योगले कर्मचारीको अनिवार्य अबकासपछि उनीहरुला दिनुपर्ने उपदान, बिमा, बिदा संचिति र औषधि बापतको रकम समेत दिन सकेको छैन । अबकासमा गएका कर्मचारीहरु आफूहरुले पाउनु पर्ने उक्त रकम लामो समय देखि नपाउँदा अहिले उनीहरुले आन्दोलन नै गरिरहेका छन् । उद्योगको मुल गेटमा बसेर अहिले दिनहु जसो धर्ना दिईरहेका छन् ।

बिद्युत उपयोग गरेर महशुल्क नबुझाउनेमा त्रियुगा नगरपालिका र रौतामाई गाउँपालिका रहेको प्राधिकरणले जनाएको छ । त्रियुगाले ३ करोड ३४ लाख ९६१ रुपैया बुझाउन बाकी रहेको छ । समयमा महशुल्क नबुझाउदा त्रियुगाको ३४ लाख ३६ हजार ९६१ रुपैया त जरिवाना मात्र तिर्नु पर्ने दायित्व रहेको छ ।

रौतामाईले १ लाख ९४ हजार ५६९ महशुल्क बुझाउन बाकी रहेको छ । ३८ हजार ९१३ रुपैया जरीवाना तिर्नु पर्ने प्राधिकरण गाईघाटले जनाएको छ । बक्यौता महशुल्क उठाउने बिषय प्राधिकरणले केन्द्रलाई जानकारी गराई सकेको शाखा कार्यालय उदयपुरका प्रमुख बिजयबाबु खत्रीले बताए ।