सामाजिक संजाल मार्फत आफू माथि गलत उदेश्यले अफवाह फैलाएर चरित्र हत्या गर्न खोजेको आरोप

श्याम राइ गाइघाट, ३१ श्रावण | कटारी नगरपालिकाका मेयर राजेशचन्द्र श्रेष्ठले अहिले प्रतिपक्षीहरुले सामाजिक संजाल मार्फत आफू माथि गलत उदेश्यले अफवाह फैलाएर चरित्र हत्या गर्न खोजेको बताएका छन् ।

बुधबार आफ्नो कार्यकक्षमा आयोजित प्रेसमिटमा उनले राम्रो काम गर्दा गर्दै पनि अहिले कसरी मेयरलाई असफल बनाउने भनेर प्रतिपक्षीहरु खुलेरै लागि परेको बताए । मलाई असफल बनाउन निर्धारीत समयमा निती तथा कार्यक्रम र बजेट ल्याउन दिएनन्, अहिले फेरी खर्चको बिषय उठाएर बदनाम गर्न खोजिएको छ । उनले भने ।

कार्यपालिकामा उनीहरुको बहुमत भएकोले परिषद् अगाडी कार्यपालिकाको बैठक पटकपटक बस्न खोजियो तर उनीहरु उपस्थिती नै नहुने उनले भने । अनि निर्धारीत समयमा परिषद् नै हुन सकेन । अहिले निर्धारीत समय भन्दा एक महिनापछि श्रावन २७ गते परिषद् सम्पन्न गरियो उनीहरुको पूर्ण सहयोगमा गरिएको परिषद्पछि भने नकारात्मक सन्देश जानेगरि सामाजिक संजालमा मेयर र प्रमुख प्रशासकीय अधिकृत  बारे मिथ्या प्रचार गरिएको उनले बताए ।

बिगतको अरुको कार्यकाल भन्दा आफूले राम्रो ढंगले पार्दर्शीपूर्बक काम गरिरहेको उनले बताए ।

६ बर्ष अघि ईन्धनमा १ करोड भन्दा बढी खर्च मेयरले गरेकोमा अहिले आफूले ३४ लाख जति मात्र गरेको उनले बताए । जति बेला ईन्धनको मुल्य कम थियो । सवारी साधन पनि थोरै थियो । त्यति बेला १ करोड खर्च ईन्धनमा भएको थियो । त्यस हिसाबले अहिले ३ करोड भन्दा माथि खर्च ईन्धनमा गर्नु पर्ने हुन्थ्यो । मेयर श्रेष्ठले भने ।

परिषद्मा सबैको सहमतिमा बजेट पारीत गरिएको तर अहिले प्रतिपक्षीहरुले चोर बाटोबाट बजेट ल्याईएको भन्दै गलत अफबाह फैलाउने गरेको बताए । बैशाखमा प्राप्त भएको चुनढुंगा खानीको रोयल्टी बापतको रकम टिप्पणी आदेशमा केही शिर्षक अन्तर्गत गरिएको खर्चलाई लिएर उनीहरुले गलत सन्देश प्रबाह गरेको उनले बताए । हामीले कानून अनुसार बिल भर्पाई राखेर आबश्यक काममा मात्र खर्च गरेका छौ । बिनियोजित रकममा पनि खर्च नभएको रकम पुरानो दायित्वमा समेत खर्च गरेको उनले बताए ।

परिषद्मा सबै छलफल भएर पास भएको भए पनि अहिले एक्कासी सम्पन्न भैसकेको बिषयमा गलत सदन्देश जानेगरि सामाजिक संजालमा कुरा उठाउने कामले आफू चकित भएको मेयर श्रेष्ठले बताए । मैले केही गलत गरेको छैन, सबै कानून सम्बत भएको छ । उनले भने । यदि कसैले मैले गलत गरेको प्रमाणित गराएर देखाई दिएमा आफू जस्तोसुकै सजाय भोग्न तयार रहेको र राजनीतिबाट समेत सधैका लागि अलग रहने उनले बताए ।