.gif)
विराटनगर | नेपाली कांग्रेसका नेता महेश आचार्यले वीपी कोइरालाको आदर्श र सिद्धान्त छाडेकै कारण नेपाली कांग्रेस कमजोर हुँदै गएको बताउनुभएको छ ।
सोमबार नेपाली कांग्रेस मोरङले वीपी कोइरालाको १११ औं जन्मजन्यतीका अवसरमा आयोजना गरेको विचार गोष्ठीलाई सम्बोधन गर्दै नेता आचार्यले अहिले कांग्रेस इतिहासकै सबैभन्दा कठिन मोडबाट अगाडि बढिरहेको बताउनुभयो । विभिन्न गुट, उपगुटले कांग्रेसलाई कमजोर बनाउँदै लगेको बताउँदै नेता आचार्यले कांग्रेसमा रुपान्तरण जरुरी रहेको विचार व्यक्त गर्नुभयो ।
निर्वाचनमा कसैैसित पनि गठबन्धन गर्नुहुँदैन भनेर आफूले बारम्बार भनेको स्मरण गर्नुभयो । ‘गठबन्धन गर्दा अहिले कांग्रेसको अवस्था कस्तो छ भनेर भनिरहनु पर्दैन,’ उनले भने, ‘सारा कार्यकर्ताको भावनाविपरीत गरिएको गठबन्धनका कारण कांग्रेसी नेता कार्यकर्तामा निराशा छाएको छ ।’
कार्यक्रममा नेपाली कांग्रेसका केन्द्रीय सदस्य अमृत अर्यालले कांग्रेस एकढिक्का भएमा कसैले पनि निर्वाचनमा पराजित गर्न नसक्ने उल्लेख गर्नुभयो । उहाँले उरुसित लड्नपर्ने कांग्रेस आफैंसित लडिरहेको दुखेसो पोख्नुभयो । कोशी प्रदेशका मुख्यमन्त्री केदार कार्कीले आफूले अघि सारेका योजनालाई स्थापित गर्न पार्टीले सहयोग नगरेको बताउनुभयो ।
कार्यक्रममा नेपाली कांग्रेस कोशी प्रदेशका कोषाध्यक्ष राजेश गुप्ता, मोरङका वरिष्ठ नेता गोपालमानसिंह राजभण्डारी, वसन्त भट्टराई, मोरङ कांग्रेसका कार्यबाहक सभापति भक्तिनाथ माझी, उपसभापति नागेश कोइराला, सचिव मोदराज घिमिरे, विराटनगर सभापति दीपक चापागाईं, प्रेस युनियन कोशी प्रदेशका अध्यक्ष मीनकुमार नवोदित, महिला संघ मोरङ अध्यक्ष शान्ता पौडेललगायतले वीपीको आदर्श र सिद्धान्तलाई आत्मसाथ गरेर अगाडि बढे मात्रै देश समृद्ध हुने विचार राख्नुभएको थियो ।
Post a Comment