ग्रामथानमा ७१.३३ प्रतिशत मतदान, मतपेटिका ओसारिदै, आजैदेखि गणना शुरु गर्ने तयारी
विराटनगर १६ मंसिर । मोरङ ग्रामथान गाउँपालिकाको अध्यक्ष पदमा आज सम्पन्न उपनिर्वाचनमा ७१दशमलव ३३ प्रतिशत मतदान भएको छ । मतदानमा १८ हजार ५७८ जनाले मतदान गरेका छन् । मतदान गर्ने मध्ये ९ हजार १२ महिला र ८ हजार ९६६ पुरुषले मतदान गरेको मुख्य निर्वाचन अधिकृतको कार्यालयका सहायक निर्वाचन अधिकृत रामराज पौडेलले बताउनुभयो ।
ग्रामथानका १२ मतदान स्थलका २९ मतदान केन्द्र मध्ये ग्रामथान १ को वेगनलाल आधारभुत विद्यालय मतदान केन्द्रमा सवैभन्दा बढी मतदान भएको छ । सो केन्द्रमा ७७७ मतदाता रहेकोमा ६१२ अर्थात ७८ दशमलव ७६ प्रतिशत मतदान भएको छ । सवैभन्दा कम वडा नंं ६ को पब्लिक मावि रविहाटबाट मतदान भएको छ । सो केन्द्रका ३ हजार ७५५ मतदाता मध्ये २ हजार ५३३ मतदाताले मतदान गरेका छन् । ४ वटा मतदान केन्द्र रहेको पव्लिक मावि मतदानस्थलबाट ६७ दशमलव ४६ प्रतिशत मतदान भएको छ ।
ग्रामथान १ को वीरेन्द्र मावि लखन्तरी मतदान स्थलमा ७८.११ प्रतिशत, सरस्वती मावि झोराहाट मतदान स्थलमा ७०.१३ प्रतिशत , वडा नं २ कार्यालय मतदानलस्थलमा ७३ दशमलव ४१ प्रतिशत, वाणी मावि सिद्राहा मतदान स्थलमा ७४.८५ प्रतिशत, राधाकृष्ण आधारभुत विद्यालय भौंसावाडी मतदान स्थल ७९.२३ प्रतिशत, लोहोन्द्रा आधारभुत विद्यालय मोतिपुर मतदानस्थलमा ६७.२८ प्रतिशत, महेन्द्र मावि लोहासुर मतदानस्थलमा ७४.२४ प्रतिशत, देवी मावि तेतरिया मतदान स्थलमा ६८.२७ प्रतिशत, गणेश मावि धोवियारे मतदान स्थलमा ६८.९५ प्रतिशत र सरस्वती आधारतभुत विद्यालय वनिगामा मतदान स्थलमा ६८.२८ प्रतिशत मतदान भएको निर्वाचन अधिकृतको कार्यालयले जनाएको छ ।
ग्रामथानको अध्यक्ष पदमा १५ राजनीति दल र एक स्वतन्त्र गरि १६ जना प्रतिष्पर्धामा छन् ।
आजैदेखी मतगणना शुरु गर्ने तयारी
ग्रामथानको अध्यक्ष पदमा आजैदेखि मतगणना शुरु गर्ने तयारी गरिएको छ । अहिले मतपेटिका संकलनको काम भईरहेको र मतगणनास्थल गाउँपालिका कार्यालयमा मतपेटिकाहरु आईसकेपछि सर्वदलिय बैठक गरेर आजै रातीदेखि मतगणनाको तयारी गरिएको सहायक निर्वाचन अधिकृत रामराज पौडेलले बताउनुभयो ।
