इक्युवालिटि कप क्रिकेट सोमबारदेखि विराटनगरमा सुरु
विराटनगर चैत १८ गते । महिला समानताका लागि नेपाल क्रिकेट फाउण्डेशनले भुइँतह तथा महिला विकासका लागि चौथोँ संस्करणको ‘इक्वालिटि कप क्रिकेट २०२५’ प्रतियोगिता आयोजना शुरु भएको छ ।
विराटनगर ६ मा रहेको म्यारिलिबोन ज्वाला क्रिकेट ग्राउण्डमा सोमबार भएको खेलमा सप्तरी र मोरङले विजयी शुरुवात गरेका छन् । पहिलो खेलमा सप्तरीले इलामलाई ८ विकेटले पराजित गरेको छ । टस जितेर ब्याटिङ गरेको इलामले निर्धारित २० ओभरमा ६ विकेट गुमाई १ सय १७ रनको योगफल तयार पारेको थियो । इलामकी प्रियैका राई सर्वाधिक ४१ रन बनाइन् । सप्तरीकी सुस्मिता यादवले सर्वाधक २ विकेट लिइन् ।
१ सय १८ रनको लक्ष्य पछ्याएको सप्तरीले १४ दशमलव १ बलमा २ विकेट गुमाई सो विजयी लक्ष्य पार गरेको थियो । सप्तरीको जितमा प्लेयर अफ द म्याच साक्षी यादवले अविजित ६० रन बनाउँदा बन्दना रजकले पनि अविजित १३ रनको योगदान दिइन् । इलामकी मुना राई र टिकामाया तामाङले १–१ विकेट लिइन् ।
लोस्रो खेलमा मोरङले सिरहालाई ७ विकेटले पराजित गरेको छ । टस जितेर ब्याटिङ गरेको सिरहाले निर्धारित २० ओभरको खेलमा १२ दशमलव २ बलमा सवै विकेट गुमाउँदा ६० रनमा सिमित भयो । सिरहाका कुनै पनि ब्याटरले दोहोरा अंकलाई छुन सकेनन् । मोरङकी प्लेयर अफ म्याच कृतिषा धामीले सर्वाधिक ५ विकेट लिइन् । उनले ४ ओभरमा १६ रन दिएकी थिइन् ।
६१ रनको झिनो लक्ष्य पछ्याएको मोरङले ९ दशमलव १ बलमा ३ विकेट गुमाउँदै लक्ष्य पार गरेको थियो । मोरङ जितमा सानु राजवंशीले अविजित २८ रन बनाउँदा टिका साहले १५ रन बनाइन् ।
यस अघि प्रतियोगिताको उद्घाटन विराटनगर महानगरपवालिकाका प्रमुख नागेश कोइरालले ब्याटिङ, कोशी प्रदेश क्रिकेट संघका अध्यक्ष सर्वजितराज पाण्डेले बलिङ र सिनियर एम्पायरले विकेट किपिङ गर्दै गरे ।
प्रतियोगितामा कोशी प्रदेशका मोरङ र इलाम तथा मधेश प्रदेशका सिरहा र सप्तरीका महिला टिमहरू सहभागी रहेको खेल संयोजक मन्दिप साहले बताए । खेल लिगको आधारमा खेलाइने प्रतियोगिता विहिबार सम्म हुने छ । लिगमा टप गर्ने दुई टिमविच फाइनल खेलाइने आयोजकले जनाएको छ ।
प्रतियोगितालाई म्यारिलीबोन क्रिकेट क्लब फाउण्डेशन र क्रिकेट विथआउट बाउण्ड्रीजको सहयोगमा क्रिकेटमा महिलाको सहभागिता अभिवृद्धि अभियान अन्तर्गत इक्युवालिटि कप क्रिकेट आयोजना गर्दै आएको साहले बताए ।
आयोजक फाउण्डेसनले प्रतियोगिताका लागि साढे ६ लाख रुपैया खर्च हुने अनुमान गरिएको छ । गत संस्करणमा भने मोरङ महिला टोलीले उपाधि हात पारेको थियो ।